情人节2020小心中伏！情人节必避爱情电影推介《心跳500天》结局男女朋友分手收场？

　　情人节是一个浪漫的节日，不少男女朋友都会看爱情电影应节，享受二人世界！不过看还看，编辑都要提醒大家，有些爱情电影，如《心跳500天》这种，情侣真是「碰不得」！ 讲分手、讲心淡、讲爱情几薄弱，情人节最好「敬而远之」。无论是有情人的你，还是一早看淡爱情的你，以下的情人节「必避」爱情电影推介相信都能满足你的好奇心吧！

　　情人节必「避」电影推介：《无痛失恋》Eternal Sunshine of the Spotless Mind

　　睇到戏名有关失恋都知道唔掂得？唔止咁简单，电影故事讲失恋嘅主角为咗忘记同前女友幸福但折磨人嘅回忆，决心接受洗脑手术，但手术中途慢慢发现唔想失去呢刻珍贵嘅历程，可惜已经为时已晚！

　　谂下情人节同而家嘅另一半睇，你同佢谂起前度几唔好意思？唔觉意细味到爱情嘅无奈同哀愁都唔应节啦！

　　情人节必「避」电影推介：《触不到的她》Her

　　有关爱情，「触不到」都已经好Hurt啦，呢套仲系将孤独感拍到极致嘅电影。故事讲失婚嘅男主角失唔出情伤，日复日过行尸走肉的营役生活，偶然恋上「人工智能」助手，同一把女声发生感情，最后骇然发现唔止感情「唔真实」，连带以为独一无二嘅「恋人」都唔真实。

　　电影带出爱情甜得虐心又令人痛得揪心嘅现实，睇完个心Up一排都似。

　　电影好多画面都令观众感同身受主角嘅孤独感，倒模生活配上冷冰冰嘅情感，加上唔系个个都有真命天子天女嘅真相，真实得恐怖，边个要同另一半喺情人节体会爱情同生活嘅虚幻呢？

　　情人节必「避」电影推介：《有人喜欢蓝》Blue Valentine

　　最灿烂嘅感情总会被现实磨蚀。如果想同另一半开心过节，呢套电影真系绝对唔岩睇。男女主角喺最青春自我嘅时候相遇相爱，结婚生子后却被现实愈拉愈远，甚至将方「当初嘅美好」变成缺点，连场争执将曾经火热的爱情烧成灰，就算再次记起如何相爱，亦未能回到最初的起点。

　　天生带有抑郁感嘅男主角Ryan Rosling於戏中多场求老婆回心转意嘅场口都令人痛心。

　　Michelle Williams嘅内心挣扎同样折磨观众，如果生活令你唔能够再爱你好爱嘅人，要去怪现实，定系怪爱情曾经留下太大光环？情人节睇完即反思关系或者对婚姻却步，点搞？

　　情人节必「避」电影推介：《失踪罪》Gone Girl

　　（剧透慎入）呢套虽然唔系主打爱情几薄弱，不过讲婚姻信唔过都算，最大镬讲到娶错人可能咁就一世！

　　男主角于片中偷食背叛婚姻，老婆就设局屈佢杀死自己，搞到佢一身蚁，最后仲出尽计谋搞大自己个肚，再番男主角身边，令对方焗住同机关算尽嘅人做人世。男友情人节睇完，会唔会伸女友一脚架？

　　情人节必「避」电影推介：《光猪舞壮士》Magic Mike

　　唔系只系失恋戏唔岩情侣睇架，呢套有荷里活男神Channing Tatum做「脱衣舞男」嘅电影都唔岩一对小情人睇！

　　想像下女友全程目光集中于一众型男剥光猪跳舞场面，仲要Channing有样有身材，有情话又有诱人舞技，搞到女友于男友身边，对另一男士有瘕想，又或者埋怨男友Package唔掂，咁就唔好啦！

　　情人节必「避」电影推介：《诱心人》Closer

　　呢套系Jude Law颜值巅峰时期作品，但情人节都系不宜观看。电影讲四个男女错综复杂嘅关系，当中嘅痴缠同背叛赤裸得过份，唔难动摇观众对爱情嘅憧憬。

　　故事讲Jude Law挞著Natalie Portman，热情退去后偷食，女友同时与后生仔互相试探同亲近，四人于不安份嘅爱情关系中摸索而又互相伤害。

　　最后可能得出「闭起双眼你最挂念谁，眼睛张开身边竟是谁」嘅结局，令人对爱情嘅无奈又爱又恨。

　　情人节必「避」电影推介：《心跳500天》500 Days of Summer

　　情人节唔少人都想同另一半冧住过，呢部电影系有冧位，但出事位更多，事关当中太多恋爱二三事，你同我都有机会经历过，因为太贴近，所以更伤感！电影讲男主角挞著开朗女孩，对爱情大有期许，惟二人最终都由热恋时浓情化不开，走到分手收场。男方走唔出情变之际，女方就已经有完满新恋情，曾经相爱嘅，最后仅成过客。

　　分手系令人伤感，电影中二人睇落系因为旁人眼中嘅琐碎事而导致情变，但事实系人人都可能经历过嘅性格问题，连主角Joseph Gordon-Levitt都为「女友」最后火速有新仔护航，表示男主角只睇到自己想要嘅爱情，无法接受现实。

　　电影中二人分享心爱音乐又拍拖行IKEA嘅场面，几乎对对情侣都做过，想要同另一半共通情感同规划未来。又有边个想同另一半睇到，好似佢哋咁贴地相爱嘅人，最终成为仅仅擦身而过嘅人？